Mob Papua

• Tai Ayam

Ada nene dan tete dong dua ada mo duduk pacaran jadi tete langsung bilang nene " sayang ko duduk"
nene su duduk trus nene de mo berdiri suruh tete duduk di samping nene, pas tete de mo duduk nene ko balik lihat tete ada mo duduk begini nene lihat di sebelah ada tai ayam jadi nene bilang tete : " tete awas ada tai ayam " langsung tete toki testa baru bilang :" cukimai seh, ini anak kecil siapa yang berak tai ayam di sini "

• Pendeta Ada Pu Karunia

 Jadi satu hari ada tete Welem de pi ke Bapa Pendeta yang pu karunia untuk bisa sembuhkan orang-orang sakit. Jadi langsung tete welem de tanya pace pendeta itu.

Tete Welem : " Bapa, sa ada dengar-dengar Bapa Pendeta ko ada pu karunia kah? "
langsung pace Pendeta de jawab.

Pendeta : " iyo Bapa, ada yang sa bisa bantu doakan biar sembuhkah? "

langsung tete Welem de kasih tau de pu keluhan kah ini.

Tete Welem : " jadi begini Bapa Pendeta, sa ni su tua tapi sa ingin menikmati rasa muda lagi. Bapa Pendeta bisa bantu buat sa pu barang di bawah ini de berdiri lagi kah? "

pace Pendeta de kaget baru langsung de jawab.

Pendeta : " Oh begini tete , Tuhan ada kasih sa karunia buat sembuhkan orang. Orang buta bisa melihat, orang tuli bisa mendengar, orang lumpuh berjalan, tapi ... sa mohon maaf skali eh tete, untuk saat ini sa tra pu karunia untuk bangkitkan yang su mati... "

•  Napi Pancuri Kasbi

Napi 3 dong pi pancuri kasbi, selesai dan dong bawa pulang baru dong 3 masak akan, pas mo makan, pace napi satu de pimpin doa makan. Berdoa mulai ...
 pace de tekan doa deng bahasa biak

" Manseren no wama berkati yo robeyan ine sedokan karbore mesri ido ko karau we... "
(de pu arti, "Tuhan berkati makanan ini supaya kami makan dan kenyang, supaya besok bisa pancuri lagi)

hahaha napi pu doa asli kah trada? supaya besok bisa pi pancuri lagi wkwkwkw

• Juara di Kelas

Suatu hari ada anak satu de sekolah di kampug, sekolah di kampung tapi karna fasilitas tra lengkap jadi de bapa bilang sama dia : " anak, itu ada program pemerintah itu besok ko sekolah di jawa ".
Besok langsung anak de ke jawa, 1 bulan 2 bulan lewat sampe tra lama sudah semester 1 jadi de bapa telpon.

Bapa : " anak, baru bagaimana ko ada peringkat berapa ka? "

anak : " iyo bapa sa peringkat 45 "

Bapa : " dari berapa siswa anak? "

anak : " adoh bapa, kebetulan dari 45 siswa sa yang dapat peringkat 45 "

bapa : " itu bukan peringkat anak! itu sama saja ko bikin malu bapa, sudah besok pokoknya ko pulang sekolah di kampung kampung "

besok de bapa kirim tiket dan anak de pulang, sampe di kampung, de sekolah, sekolah sampe masuk semester 2 de bapa telpon.

bapa : " anak baru bagaimana? "

anak : " adoh bapa terimakasih, ini berkat doa bapa juga, bapa biasa berdoa untuk sa kah? "

bapa : " iyo anak bapa biasa berdoa buat ko, bapa punya doa biar ko di situ rajin belajar, di tempat berburu juga bapa rajin belajar, di tempat berburu juga sementara kita buru babi juga bapa berdoa , jadi ko peringkat berapa anak? "

anak : " sa peringkat 2 bapa "

bapa : aduuhhh ! terimakasih anak ko tambah pintar!!! heeee bapa tidak bisa lukiskan dengan kata kata, jadi sekarang alat-alat apa yang anak butuhkan? "

anak : " bapa sekarang kita sudah mulai perkenlan alat alat elektronik, macam komputer, trus leptop, trus motor, karna sa jalan juga ini mengganggu sa pu konsentrasi "

bapa : " pokoknya anak ko pu prestasi bapa dukung, besok bapa akan bawa barang barang itu satu truck"

besok dan de bapa tiba, langsung de lari polo  de anak " aduh anak cinta sayang , adohhh ko su tambah pintar ini adohh luar biasa, baru bagaimana? ko belajar bagaimana?

bapa : " baru ko pu teman teman yang lain? kenapa cuma ada ko dengan paitua markus mata besar ini?"

anak : " aah bapa, yang sekolah di sini kitong 2 markus saja, jadi markus de juara 1 , sa juara 2 "

bapa : " heh.... kuarang ajar !! anak itu bukan ko peringkat ! ko juara terakhir sama saja cukimaii !! "